張偉賢（Wilson），二十八歲，他暫時還是全世界唯一一個華裔極地探險導賞員，爬上過歐洲、亞洲好多個山脈，遊歷超過二十個國家地區。他現在居住在德國，工作和進修就在挪威、英國；三、四月就去南極；六、七月就去北極；中間時間就在瑞士；九、十月有時間就返回香港探望親朋戚友，名副其實世界公民。他特別喜愛和相識於微時的朋友談天說地，他認為只有約見舊朋友，才會回想起自己曾經是一個怎樣的人，這是很重要的。

　　由於他經常來往南北兩極，他對香港的感覺十分特別，他說： 「你知唔知，其實如果人一日唔離開屋企，出去走走，你永遠唔會感受到屋企嘅感覺；我每次返嚟香港我都有呢種強烈嘅感覺，係家嘅感覺。」這是有關歸屬感的問題，我當然明白和同意。

　　他和我一樣是在新界北區成長，就讀同一間中學，他一家四口，有位細他一歲的弟弟，父親是地盤雜工，主要工作是執泥頭，搬磚，執木板；母親是清潔工人，主要是洗碗和倒垃圾，張偉賢回想童年時，母親經常對他說：

　　「真係好唔夠錢使，你要生性，畀心機讀書，唔好成隻甩繩馬騮咁，只係顧住通山走。我成日都同你兩兄弟講，將來最好做醫生或者律師，賺多些錢買樓，咁我就安樂晒。」

　　但是對於喜愛大自然的張偉賢來說，在商業社會唯利是圖並不是他的意願，所以當他完成跨文化歐洲戶外研究碩士學位後，開始追求理想，尋找自己的道路，他經常和我說：

　　「由於細個冇零用錢，好多時都係靠執汽水罐，賣樽嚟搵零用錢，所以我對於錢嘅睇法有點特別，我認為錢對我嚟講係唔重要，不過冇錢就生活唔到，所以足夠就得。但係點為之足夠？對我嚟講，只要有地方住、有衫着、食得飽，之後再有多餘錢做旅行嘅交通費咁就足夠，人最重要係要身體力行，感受自己係大自然嘅一分子。」

　　其實他為了實踐自己的理想，最初隻身走到瑞士，目的很純粹，就是想征服阿爾卑斯山和尋找就業機會，可是由於人生路不熟，最初他只能夠找到一些幫人煮飯和洗廁所的工作，同時間也不斷留意其他請人消息，結果給他留意到有夏令營招聘攀石教練，於是在他努力爭取下得到職位。對於走出香港的決心，他經常以巴甫洛夫嘅「條件反射」學說和朋友分享：

　　「喺印度同泰國隨處可以見到一個荒謬嘅場景，就係只要用一碌好細嘅柱，同埋一條好細嘅鏈，就可以捆綁住一隻千斤重嘅大象，點解呢？原來個養象嘅人，喺大象仲係小象嘅時候，就用一條鐵鏈將它綁喺水泥樁或鐵柱上，無論小象點樣掙扎都無法掙脫。久而久之，小象漸漸習慣咗唔掙扎，因為掙扎嚟都冇用，直到小象成長到大象嘅時候，其實嗰時大象本來可以輕而易舉地掙脫鐵鏈，但係佢已經唔記得掙脫嘅意識係點，一直認為自己無辦法掙脫鐵鏈，其實大象係畀自己扭曲嘅習慣意識綁住，實則係養象嘅人綁住咗大象。」

　　我知道這是古典制約其中一種，用「條件反射」原理養大象，大象下意識按照養象人嘅意旨要「自律」；只要用「條件反射」原理推論人類行為，人就成為咗好聽主流聲音嘅工具，例如： 「你都就嚟三十歲人，係時候要結婚生仔」； 「你要畀心機讀書，你將來一定要做專業人士」； 「你要搵多點錢傍身，最好供番層樓」； 「我打工㗎咋，最緊要安安穩穩，放假就食吓自助餐，去吓旅行，夢想等退休先至講。」

　　記得有次張偉賢對我自嘲地說：

　　「我係冇車冇樓冇狗冇女友，搵錢唔算多，但係我懂得嘅知識同經驗，遠比金錢重要，呢個先至係人生的最大意義。你想像吓，當你喺南極嘅雪地上，有五十萬隻皇帝企鵝喺你面前，壯觀嘅場面絕對令你驚嘆大自然嘅奧妙；當你揸住架衝鋒艇遊冰川時候，有鯨魚喺你艇下游過，然後將個頭冒出水面，望你一眼就轉身而去，嗰種感覺簡直妙不可言，我包你瞓緊覺都會喺度笑。」

　　說實話，和他交談是一件樂事，因為他很明白自己是屬於世界，而不是一個城市，甚至是一個國家，有這種價值觀是很難得。由於他工作會面對不同的危險，例如爬山和攀石，我問他有關對死亡的看法時，他認為：

　　「死亡只係一個點，生命最重要係過程，就算依家結束我嘅生命都冇問題，因為我過得好快樂，可以做自己想做嘅工作；同時間，我嘅生命經驗喺度影響唔同嘅人，同佢哋互相扣連，留低一種以身體力行換取嘅智慧，繼續傳播開去。」【101】

（原載 香港大公報 2014年09月18日B14版）