【藝壇隨筆錄：李俊亮】其實，學院31年嚟，有冇人投訴過大堂同地毯有問題呢？有冇因為依家大堂嘅設計被人話過唔夠創新，而冇人嚟租場，做演出，同睼演出？有冇因為唔夠空間而發生意外？改建以後究竟多左尐咩空間呢？成個工程要駛幾多錢呢？尐錢用係教學，改善員工福利唔係好尐咩？

　　此外，advisory working group究竟由咩人組成？有冇代表性？有冇權責？開會有冇議程？開會有冇會議記錄？可唔可以旁聽？仲有點解開親會都冇人同校長做即時傳譯？或者冇事先張揚的地毯事件，就唔揭發改建大堂，變相成為捆綁式發展工程。究竟，校方未來或者現在嘅決策，仲有幾多係關我地學生、教職員、舊生、同各持份者嘅事，而我地又唔會知呢？

　　明天晚上由六院學生會和舞台及製作藝術校友會發起的「參與校園發展公開論壇」，在此呼籲演藝學生、教職員、校友及關心人士出席。

演藝紫地毯 事件簿：

1984 年
香港演藝學院成立，一直都係香港唯一一間專上表演藝術院校，
戲劇、音樂、舞蹈、電影電視、舞台及製作藝術及戲曲六個不同嘅藝術範疇於一身。

2008年左右
電影電視學院搬左去薄扶林嘅伯大尼古蹟校園。31年嚟，咁多間學院都係駐守係灣仔告士打道一號。如果去google 搜尋學院資料，係地址網頁下面，仲有嘅係代表色﹕紫色
對學校、舊生、學生同公眾，紫色就好似corporate colour一樣。31年嚟，學院地毯都係紫色同綠色配搭，配合學院三角幾何的建築設計，地毯用舊左就梗係要換，但係一直都係換返同一樣嘅顏色。

2015年8月27日
由校園持續發展部發出嘅通告話9月11 日開始，更換一樓至三樓嘅地毯。通告提及嘅只係「carpet replacement work」，但係就冇提及要更換地毯嘅顏色，又或者要配合其他工程。

9月11日
點知一換就將極有代表嘅「演藝紫」變成依家呢隻「殯儀藍」。校方換地毯顏色，好似冇咨詢學院裡面唔同嘅持份者意見，就連客戶服務部都唔知要換色。

9月13日
換左「殯儀藍」之後，有人發起網上群組，反映意見，表示不滿。校友會及六院學生會，同埋有超過1400人加入「我們想要回屬於大家的顏色」嘅群組，都分別發信俾校方同校董會，要求交代更換地毯嘅原因同理據、決策程序及諮詢過程，有冇評估改變設計對持份者同學院形象嘅影響。

校董會嘅回覆係「由於學校行政乃校長直接管轄範圍，所以貴會的查詢已轉交校長直接回應，相信校長短期內會作回覆」。校方就一直冇正面回覆提問同晚，換地毯工程繼續。

9月15日
校方就急急通知全校師生及舊生出席9月16日1點至2點嘅簡報會。簡報會用左約30分鐘講OCE發展，之後就講換地毯事件。校園持續發展部代表話，理解紫色同綠色嘅配搭係大家嘅集體回憶。但係，同顧問同設計師商議後，更換地毯顏色係為左襟用 durability， 換左咁多次地毯，認為呢兩隻色較淺，唔襟烏糟，要成日打理係比較難 maintain（保養）。所以，校方先至考慮用一種更深嘅顏色，希望襟用同襟烏糟。為左襟用襟烏糟而換走「演藝紫」﹖

師生舊生咁大不滿同迥響，顯示出師生同校方之間，有好大隔膜冇良好同健全嘅溝通渠道同機會。

咁究竟係邊個決定換「殯儀藍」呢﹖邊個要負責﹖校長就話低估左換地毯引起反應

簡報會中，師生關注同強烈要求校方，將「殯儀藍」地毯變返做「演藝紫」。校方承諾係一個星期內回覆。邀請學生代表參與討論見過校友會、評議會、教職員代表。網上群組以問卷收集大家對地毯事件嘅意見。

9月22日
校方同學生代表會面，竟然擺出個風水陣，將學生代表隔開嚟坐。

六院展示網上問卷調查，四百人中，有90％希望學校盡快將地毯換返原色設計。
六院學生會收集超過三百位學生簽名要求「學校盡快換回原色地毯」。一句到尾，盡快還我演藝紫。
校方表示係有意還我地本色，但係時間表又答唔實喎。答得實嘅竟然係，校方計劃在不久將來會翻新地下大堂，將換地毯跟地下翻新工程拉埋一齊。“邀請”學生及教職員代表俾意見同參與校方同設計師嘅討論。
咁即係，唔換地毯搞倒大家不滿，都唔知校方竟然想搞大堂，或者係revitalize 以全新面貌見街坊。

9月23日
終於等到校方書面回覆但係就有呢一句: 「With the input of everyone, we have now decided to combine the consultation of the G/F Atrium redesign project with the 1/F to come up with a holistic design for our ceremonial and public-facing gateway to the Academy.」當中的everyone 同we，究竟係指邊班人﹖要求換回地毯事件，相變翻身工程﹖

9月29日
其實開學大家都好忙，又有成400人聯署。除左以前提出的要求:
-更希望校方應該集中精力處理教學、練習同儲存等空間不足嘅問題，而唔係其他冇迫切性嘅事
-承諾係未來嘅發展中”stand firm on our tradition and embrace our heritage”，確保學院的優良傳統及師生校友的集體回憶能得以保留、承傳
-改革現時制度，開放渠道讓師生校友參與決策

聯署俾左校方七日，就好似山中方七日，人間幾十年，貼到入男厠尿兜，終於等到10月8日有回覆。

10月6日
其實校方已經約左學生代表、教職員代表，同已經委任左嘅設計師Berrie Ho何周禮交流下設計構念。但係討論的翻新工程，而唔係換地毯，即係要改變整個大堂嘅面貌，包括大堂入口、重新設計售票處、改建大堂樓梯以安排更多空間作為辦公室之用當然唔少得LED Mon呢尐Cyber 嘢。

校方之後出信:「We would like to see the whole Artium transformed: to showcase our corportate identity…...」we又係代表邊個﹖當然，校方亦歡迎大家俾意見咁，維持原貌得唔得呀﹖

但係俾各持份者嘅信裡面，冇提及過有咩理據，同有咩需要要改建。

作者簡介：
獨立劇場創作人，集劇場導演、演員、教學於一身。1996年畢業於香港演藝學院戲劇學院導演系。現任教於香港演藝學院。

Photo│facebook

101藝術新聞網全力支持藝術表達自由，文章內容並不反映新聞網站意見和立場。